LAOAG CITY – Inlawlawag ni Atty. Arnedo Valera, maysa nga international lawyer ken agnanaed idiay Washington D.C, USA a ti pannakaipirma ti US anti-Asian hate crimes law ket dakkel a tulong iti mapaspasamak a panagatake kadagiti sumagmamano nga asyano idiay Amerika,
Ummuna iti daytoy, pinirmaan ni US President Joe Biden ti anti-Asian hate crimes law iti baet ti pandemya ken kalpasan ti pannakaatake kadagiti Asian-Americans.
Segun kenni Valera, saan laeng a “violent acts” ti adda iti nasao a linteg no diket uray pay dagiti diskriminasyon iti trabaho, dagiti maikkat iti panagtrabahoan gapo iti saan na a panagsao ti Ingles ken dadduma pay.
Inbatad pay ni Atty. Valera a napateg ti nasao a pannakapirma ti Anti-Asian hate crimes gapo ta ti maysa a rason ket agarop 20 milyon nga Asian-Americans ti adda iti Estados Unidos.
Malaksid iti daytoy, kunana pay nga importante iti pakasaritaan ti panagpirma ni Biden iti daytoy kageddan ti panangselebrar da ti Asian-American Pacific Islanders Heritage Month, ken ti panangidaulo ti kaunaan nga Asian Vice Presidente Kamala Harris.
Ummuna iti daytoy, iti kangitingitan ti pandemya gubuay ti covid-19 ket ado dagiti insidente iti nagduduma a klase na nga hate crimes.
Mainaig iti daytoy, kuna ni Valera a daytoy ti kaunaan a linteg idiay America a dua a partido wenno Democrats ken Republicans ti panangiyendorso iti daytoy.
