LAOAG CITY – Inbatad ni Ar. Arlene Ragasa, ti Officer in-charge ti Gov. Roque Ablan Senior Memorial Hospital a manarimaan pay laeng ti imbestigasyon da seknan iti reklamo dagiti nagbantay kadagiti pasyente a natakawan bayat nga adda da iti ospital.
Segun kenni Ragasa, addan ti mandar na kadagiti amin a duty personnel idi napasamak ti insidente a mangisubmitir ti report seknan iti daytoy a banag.
Kunana nga uray dagiti IT da ket binagaan da nga adalen ken alaen da amin dagiti CCTV footages a mabalin a makaitudo no siasinno ti nangala iti wallet ti bantay ti pasyente.
Inlawlawag na a manarimaan met ti panagkalap da ti impormasyon nga isu ti ited da iti pulisya para iti naan-anay a pannaka-imbestigar daytoy.
Nagkiddaw met ti naa-anay a panawen ni Ragasa iti publiko kangrunaan na iti maseknan ttapno maimbestigar da a nasayaat ti pasamak.
Kabayatanna, kunana a nakaisubmitir metten ti incident report ni Dr. Nema Queja, ti doktor a maak-akusaran a maipagarop a saan a napintas ti panangtrato na iti pasyente.
Inbatad na nga iti report nga insubmitir ti doktor ket naglikudan na ti alegasyon kontra kenkuana no sadinno ket mabalin a napigsaen na laeng ti boses na nangruna ken naka-face mask ken posible a sabali ti nangipapanan ti pasyente.
Nupay kasta, kunana nga imbestigaren da amin dagitoy tapno malawlawagan dagitoy nga isyu.
Kabayatanna, immapela ni Ragasa iti publiko nga ipadanon kadakuada kangrunaan na iti opisina na no adda dagiti pasamak iti uneg ti ospital.
Maipalagip a maluksaw ken nasakit ti nakem ni Miss Dana Caletina ditoy ciudad ti Laoag gapu pannakapukaw ti wallet na a naglaon ti 15 ribo a cash, ATM ken Identification Cards ken nagreklamo a pasyente a ni Mr. Carlito Domingo gapu iti maipagarop a saan a nasayaat a pannakisarita ken panangtrato kadakuada ni Doctora Nema Queja.
