LAOAG CITY – Inlungalong ti Provincial Veterinary Office kenni Gov. Matthew Marcos Manotoc ti pannaka-regulate dagiti mairuar a baboy ditoy probinsya.
Daytoy ket kalpasan a madlawan a bumasbassit dagiti taraken a maparparti ditoy Ilocos Norte.
Segun kenni Dr. Loida Valenzuela, Provincial Veterinarian, itay laeng kallabes ket napagnunumoan da nga ilungalong kenni Gov. Manotoc nga adda ti maximum volume ti mabalin a mairuar iti kada lawas.
Inlawlawag na a manamnama a kasarita dagiti stakeholders, farm owners karaman dagiti meat vendors para iti nasao a banag.
Inbatad na a kalikagom ti pannaka-regulate dagiti mairuar a baboy tapno saan a maibusan dagiti taraken a maparti ditoy probinsya.
Mainaig iti daytoy, kunana a saan a maipawil ti panaggatang ngem addan to ti guidelines para iti daytoy.
