LAOAG CITY – Kinumpirmaran ti Department of the Interior and Local Government (DILG) ti plano ni Police Gen. Nicolas Torre III a mangiyuswat ti reshuffle iti biang ti Philippine National Police (PNP) ti maysa kadagiti rason ti pannakarelibo na iti pwesto.
Daytoy ti inbatad ni Department of the Interior and Local Government Secretary Jonvic Remulla iti naiyuswat a press briefing iti Camp Crame.
Segun ken ni Remulla, inbilin ti National Police Commission (Napolcom) ken ni Torre nga ibabawi ti reassignment ti sumagmamano a nangangato nga opisyal, karaman ni Police Lt. Gen. Jose Melencio Nartatez Jr., ti maikadwa a kangatoan nga opisyal ti Philippine National Police nga inyakar ni Torre idiay Mindanao.
Iti opisyal a rakurak ti Napolcom, ti inyuswat nga appointment ket saan a dimmalan iti en banc approval ti komisyon, nga addaan ti bileg administratibo iti babaen ti Republic Act 6975 wenno DILG Act.
Inladawan pay ni Remulla a ti desisyon a sukatan ni Torre ket narigat ngem kasapulan ken naipatungpal daytoy para iti ”national interest” ti pagilian.
Innayon ni Remulla a nagtalinaed ti takder ni Presidente Ferdinand Marcos Jr. a masapol nga aggunay ti ”security apparatus” a naipalaon iti linteg ken respetaren ti papel ti National Police Commission.
Kabayatanna, inbatad met ni Senador Panfilo Lacson a gapu iti panagbalin a nalabes ni Torre ti makaigapu a naikkat kas mangidaulo iti nailian a pulisya.
Segun ken ni Lacson, limmabes iti otoridad na ni Torre kalpasan a maipagarop nga inikkat na ti second in-command a ni Nartatez Jr. a masapol koma nga adda ti clearance nga immuna manipod iti presidente wenno ti sekretaryo ti Department of the Interior and Local Government.
