LAOAG CITY – Balligi a naiyuswat ti maika-118 a tawen a panagkasangay ni dati a Gov. Roque B. Ablan Sr. iti Brgy. 20 ditoy siudad ti Laoag nga addaan ti tema nga “Unity in Diversity, Celebrating Our Roots and Global Contributions.”
Naiyuswat ti wreath-laying ken panangidaton kadagiti sabsabong babaen iti Philippine National Police iti mismo Gov. Roque B. Ablan Sr. Shrine.
Malaksid iti daytoy, naipaayan pay ti 21 Gun Salute ni dati a Gov. Ablan Sr. babaen iti Philippine Marines.
Nagatendar iti nasao nga aktibidad da Vice Gov. Cecilia Araneta Marcos, City Government officials ken dadduma pay pakairamanan ti pamilia Ablan.
Segun ken ni Department of Trade and Industry Assistant Secretary Kris Ablan, maysa kadagiti apoko ni dati a Gov. Ablan Sr., napateg nga iselebrar daytoy nga aldaw gapu ta nasken laeng a malagip dagiti Pilipino kangrunaanna kadagiti Ilokano ti kontribusion ken sakripisiona tapno saan a masakop dagiti Hapon ti pagilian.
Inbatadna a masapol laeng a mabigbig dagiti naaramidna kabayatan ti pananglabanna para iti pagilian nangruna ket isuna ket maibilang a bannuar idi World War II.
Kabayatanna, inlawlawag ni Philippine Overseas Employment Administration Administrator Bernard Olalia, ti nangibagi ken ni Department of Migrant Workers Sec. Hans Leo Cacdac a saan pulos a masubadan ti nagbalin a kontribusion ni dati a Gov. Ablan Sr. iti pakasaritaan ti pagilian.
Immuna iti daytoy, naideklara kas Special Non-Working Holiday ita nga aldaw iti intero a probinsia ti Ilocos Norte babaen iti bileg ti Republic Act No. 6941 tapno lagipen dagiti Ilokano ti biag ken naaramid ni dati a Gov. Ablan Sr.
