LAOAG CITY – Namnamaen ni Mr. Danver Dela Cruz, Focal Person ti Regional Agricultural Fishery Council iti National Food Authority – Regional Office I a ngumato ti presio ti irik dagiti padana a mannalon kagiddan ti panangibilin ni Presidente Ferdinand Marcos Jr. ti pannakasuspenso ti 60 nga aldaw iti importasion ti bagas.
Segun kenkuana, babaen iti daytoy nga addang ti Presidente ket maipasigurado a dagiti produktoda a maapit nga irik ket isu ti mailako kadagiti merkado publiko.
Inbatadna a masapul a maipangato ti presio ti irik dagiti lokal a mannalon apaman a naan-anay a maipatungpal ti pammilin ni Presidente Marcos.
Inlawlawagna a no isuna ti masaludsod no mano ti maikeddeng a presio ti irik iti kada kilo ket 21 a pisos tapno maalay-ayan ti panagrigat dagiti mannalon.
Kunana a no daytoy ket maaprobaran ket dakkel a tulong kadakuada a mannalon iti panagserbi kadagiti pamiliada.
Kabayatanna, kiniddaw ni Dela Cruz iti agtultuloy a panaggatang ti National Food Authority kadagiti lokal a produkto dagiti mannalon tapno ad-adda a matulungan dagitoy.
Maipalagip nga inbilin ni Pres. Marcos ti pannakasuspenso iti uneg ti 60 nga aldaw iti importasion ti bagas nga epektibo inton Septiembre 1, 2025.
