LAOAG CITY – Inpakaammo ni Sangguniang Panlungsod Member Bryan Alcid, Chairman ti Committee on Transportation ditoy siudad ti Laoag a naiyalud-od ti pannakasuspinde iti aplikasion ti Barangay Tricycle Franchise.
Segun kenkuna, daytoy ket maibasar iti City Ordinance No. 2023-023 nga adda ti nainayon idi a 378 iti Committee on Transportation nga isu ti naiyalud-od a masuspinde.
Inlawlawagna a kinasapulanda nga iyalud-od ti pannakasuspinde ti aplikasion gapu ta iyur-urayda dagiti nangipila ti amnesty a naglilinnako ti Barangay Tricycle Franchise.
Inbatadna a nailanad iti City Ordinance No. 2000-090 series of 2000 no sadino adda ti 1,700 a naiyalokar para iti Barangay Tricycle Franchise.
Nupay kasta, inpalgakna a ti laeng maus-usar ita ket sumurok-kumurang 1,400 a Barangay Tricycle Franchise.
Gapu iti daytoy, kunana a kayatna a saoen ket adda pay ti sumurok-kumurang 400 a saan pay a naus-usar.
Mainaig iti daytoy, kuna ni Konsehal Alcid a masapol pay laeng a matingiting a naimbag daytoy tapno saan nga adu unay dagiti tricycle ditoy siudad ti Laoag.
Innayonna nga iti agdama ket adda iti 2,800 a tricycle ditoy siudad idinto nga adda met iti 2,110 a tricycle iti barangay no sadino adda ti pakabuklan a 4,910 a tricycle ditoy siudad ti Laoag.
