LAOAG CITY – Agtultuloy ti imbestigasyon ti Honolulu Police Department iti pannakatay dagiti dati nga agasawa gapo iti tama ti paltog iti maysa nga homecare iti paset ti kalihi area.
Nabigbig dagitoy a da Marcus Villaspir, certified nursing aide ken ni Imelda Villaspir, pharmacy technician iti maysa a drug store ken agpada a tubo idiay Candon City, Ilocos Sur.
Iti report ni Bombo International Correspondent Manny Pascua, ni Marcus ket natay iti mismo a nakapasamakan ti insidente idinto a ni Imelda ket pimmusay bayat a maag-agasan iti Queens Medical Center.
Kunana a basar iti inisyal nga imbestigasyon dagiti otoridad, murder-suicide ti kitkitaen da nga anggulo ti pasamak.
Nupay kasta, saan pay nga ammo dagiti otoridad no siasinno kada Marcus ken Imelda ti nagpaputok ti paltog sakbay a nagpakamatay.
Naamoan pay a ni Imelda ket nangipila ti diborsyo idi Mayo 29 ken naaprubaran idi Agosto 7 ita met laeng a tawen.
Kuna met ti maysa kadagiti annak da Imelda ken Marcus a masansan nga agriri dagiti dua gapo iti pinansyal.
