LAOAG CITY – Addan ti napilaan ti reklamo iti pannakatay dagiti dua a linemen ti Ilocos Norte Electric Cooperative (INEC).
Kinumpirmaran ni Pol. Maj. Paul Benedict Parado ti Chief of Police ti ili ti San Nicolas iti eksklusibo nga innuman ti Bombo Radyo Laoag a “double reckless imprudence resulting in homicide” ti inpila da a reklamo kontra iti INEC.
Kuna na a dagiti inpilaan da ket da Engr. Felino Herbert Agdigos, residente ti Brgy. Madamba iti ili a Dingras, General Manager iti INEC, Jerry Escalona y Batangan, 51, Line Foreman, residente iti Brgy. 22 ken ni Errol Franco, 59, Design Engineer ken residente iti Brgy. 1 iti ili ti San Nicolas.
Maipalagip a saan pay a nalpas ti panagtrabaho da Talio Portela, taga Brgy. 9, kenni Marcon Domion a taga Brgy. 6 iti nasao nga ili, agpada a lineman idi makuryente dagitoy.
Immun-unan nga inbaga ti INEC a ti makagapu ti pannakakuryente dagiti dua ket posible a ti kuryente manipud iti generator set.
Ngem saan a kumbinsido dagiti kameng ti pamilya dagiti natay a linemen rason a kiniddaw da ti pannakaiwayat ti naun-uneg nga imbestigasyon.
Mainaig iti daytoy, inbaga ni Parado a naibayag ti panagipila da ti reklamo gapu ta narigatan da a nagukkon kadagiti ebidensiya nangnangruna iti tulong ti maysa electrical engineer a mangilawlawag ti posible a napasamak kadagiti biktima.
