LAOAG CITY – Burburtia iti pannakatay dagiti uppat a kalding, dua nga agina ken dua nga annak da, idiay Bungcag iti ili ti Dingras.
Segun ken ni Bgy. Chairman Jeffrey Gallegos, nakigtot da idi makita da a ti langa dagiti kalding a kukua ti agnagan ti Joey Acoba nga agindeg met la iti nasao a barangay.
Daytoy ket gapu ta malaksid a naburburburayan dagiti bagi da, adda pay abotbot na a maiyarig ti kadakkel ti piso ken tudok a maiyarig ti rawis ti bisikleta wenno icepick.
Kuna pay ni Gallegos, a saan a kunsibido nga aso ti makin aramid ti pannakatay dagiti kalding gapu ti klase dagiti dunor da.
Nupay no kasta, kuna ti kapitan a kitaen da no adda ti agwalangwalang nga aso iti lugar a nakaiwarwaranda dagiti kalding a mabalin a makin-aramid.
Insigida a naikali dagiti kalding gapu ta idi mabirukan dagitoy ket nabangsit ti angot dan.
