LAOAG CITY – Kalikagom ni Retired Police Officer Nelson Quintiñon a mangiyuswat ti Philippine National Police iti naun-uneg nga imbestigasyon mainaig iti pannakatay ti pagayam na a ni Mr. Alvin Queja, agtawen ti 51, awanan ti asawa, maysa a Person with Disability ken residente iti Barangay 14 iti ili ti Bacarra.
Inlawlawag ni Quintiñon nga adda ti dumadanun kadakuada nga impormasyon nga adda ti foul play iti pannakatay ni Alvin Queja gapu ta rumrumuar nga adda ti nangiduron bayat nga agtugtugaw iti kanal a nangitunda ti pannakaitupar ti ulo na iti semento nga isu metten ti maipagarop a nakalmesan na.
Nupay kasta, kuna ni Quintiñon a sakbay ti pannakatay ni Alvin Queja ket maipagarop a dangdangran dagiti kabagyan na kangrunaan na ti kasinsin na a ni Miss Janelle Queja.
Rumrumuar pay a dagiti maipapaay a tulong kas iti grocery ken bagas iti biktima ket dagiti kabagyan na ti mangmangan.
Innayon ni Quintiñon nga idi pinagtalaw dagiti kabagyan na ti biktima ket maipagarop nga inpabaklay da ti durabox nga ayan dagiti arwaten na ken inpalugan da ti kurung-kurong a napan iti pagnanaedan da iti Barangay 1 ken isudan ti nangtultulong kenkuana.
Mainaig iti daytoy, naglikudan dagiti kabagyan ti biktima ti alegasyon kadakuada a dinangdangran da ni Alvin Queja idi sibibiag pay.
Inpetteng ni Miss Mae Joy Provost nga adda dagiti gundaway a maungtan ti kasinsin da a ni Janelle Queja ni Alvin Queja gapu iti panagin-inom na iti arak no sadinno a saanen a makatumtumar ti maintenance na no nakainom ti nasanger.
Inpakaammo ni Provost nga idi pimmusay ni Alvin Queja ket naamoan da iti doktor nga adda ti sakit ti biktima a multiple organ disfunctions syndrome a daytoy met ti rason no apay nga adda dagiti nakita a litem iti nagduduma a paset ti bagina.
Naamoan a ti sakit ti biktima ket epekto ti nalabes a panagin-inom ti arak ken daytoy ti patien da a nakatayan na.
