LAOAG CITY – Inbilin ni Mayor Richard Degala iti ili ti Vintar ti ad-adda pay a pannakapaiget ti panagtiliw ken pannakaigalot dagiti bulos nga ayop iti nasao nga ili.
Daytoy ket tapno maliklikan dagiti possible a mapasamak nga insidente kas iti panagkamat dagiti bulos nga aso kadagiti tattao.
Malaksid iti daytoy, adda pay dagiti napaspasamak a desgrasya iti ili ti Vintar gapu kadagiti bulos nga ayop.
Innayon ni Degala a malaksid iti pannakaipupok ken pannakaigalot dagiti taraken ket masapol a mabakunaan pay dagitoy kontra iti rabies.
Mainaig iti daytoy, nakikoordinar ti lokal a gobierno kadagiti nagduduma a barangay opisyal tapno isuda ti agtiliw ken agipupuk kadagiti bulos nga ayop iti masakupan da a lugar.
