LAOAG CITY – Inbatad ni Senior Fire Officer 2 Melvin Gappi iti Bureau of Fire Protection ditoy ciudad ti Laoag nga agtultuloy ti imbestigasyon da tapno maamoan no mano amin ti balor dagiti nadadael iti pannakauram ti maysa a balay a kukua ni Mrs. Ninieta Bautista iti paset ti Barangay Nalbo ditoy ciudad.
Nupay kasta, inlawlawag nga iti inisyal nga imbestigasyon ket naduktalan da a ti nangrugyan ti uram ket ti nakasaksak nga extension iti maikadwa a kadsaaran ti balay.
Kuna na a nagpaot laeng iti 10 a minuto sakbay a nakontrol da ti apoy ngem ti nangpabayag kadakuada ket ti overhauling na gapu ta nalawa ken ado ti nauram a partes ti balay.
Innayon na nga alisto a nagramram ti apoy gapu ta ti nakailansaan dagiti galba ket kayo, malaksid pay kadagiti ado a nakapenpen a papel ken dagiti sofa a nagtinnagan ti apoy.
Naduktalan pay ti Bureau of Fire Protection nga uray iti bobeda ti balay ket ado dagiti nakapenpen a papel.
