LAOAG CITY – Emosyunal nga inyestorya ni Mrs. Josephine Gali iti Brgy. Boyboy iti ili ti Piddig ti naminpinsan a pannakauram ti pagtaenganda iti anakna.
Segun ken ni Gali, aldaw idi Disyembre 25 a nagluto ti karne nga isangpet ti anak na iti dalikan.
Kuna na a kalpasan a nagluto ket inakop na ti beggang iti dalikan sakbay a napan nagdigos ken rimuar.
Kabayatanna, inbatad na a bayat ti kaawan na iti pagtaenganna ket kellaat nga inpadamag ti anak na a maur-uram ti pagtaenganna.
Kuna na nga idi napan na kinita ket naminpinsanen a nauram ti balay na ken nagkayamkam ti apoy agingga iti balay ti anak na.
Inbunannag na nasebseban ti uram kalpasan ti sumagmamano nga oras ngem awan a pulos ti naisalbarda a gamit.
