LAOAG CITY – Agtultuloy ti imbestigasyon ti Bureau of Fire Protection (BFP) manaig iti pannakauram ti maysa a balay iti Brgy. Parparuruc iti ili ti Vintar.
Daytoy ti inbatad ni Senior Fire Officer 3 Dennis Bacnat, ti municipal firemarshall iti nasao nga ili.
Segun ken ni Bacnat, addan ti naestablisar da a possible a namonganayan ti uram ngem nagkedked paylaeng a nangipaay ti naan-anay a detalye gapu ta manarimaan paylaeng ti imbestigasyon da.
Inlawlawag ni Bacnat a bimmallasiw ti agtagikua ti balay a ni Liezel Agustin iti karruba na gapu ta nangngeg na nga agsangsangit ti ubing.
Nupay kasta, kalpasan ti agarop 30 a minutos ket adda ti nangngeg ni Agustin a mangipukpukkaw a maur-uram ti balay na no sadinno nga idi mapan na kitaen ket dumakdakkelen ti apoy.
Inpakaammo ni Bacnat a kalpasan a naipakaammo kadakuada ti napasamak ket insigida a napan nagresponde dagiti kakadwa na ngem dakkelen ti apoy idi makadanun da iti lugar.
Innayon na a ti laeng saan a dimmapo ket ti semento a paset ti balay.
Mainaig iti daytoy, kuna ni Bacnat nga inisyal nga imbestigasyon da ket saan a naus-usar ti paglutoan iti balay ngem naduktalan da a saan a naikkat ti saksakan ti electric fan.
Mapatta-patta nga umabot iti nasurok nga 400 a ribo a pisos, agdepende pay no ania ti ideklarar ni Agustin a linaon ti nauram a balay na.
Ni Agustin ket agmaymaysa nga agnanaed iti balayna
