LAOAG CITY – Inbatad ni Senior Fire Officer 1 Bryan Camalig iti Bureau of Fire Protection (BFP) iti ili ti Pasuquin nga agtultuloy pay laeng iti imbestigasyon da iti pannakauram ti maysa a motorsiklo iti paset ti Barangay Nalbo iti nasao nga ili.
Inlawlawag na a basar iti akinkukua ti motorsiklo ket naggapo iti Barangay Estancia iti ili ti Pagudpud no sadinno nga idi agawid ken nakadanun iti national highway a paset ti Brgy. Nalbo ket kellaat lattan a nauram ti asideg ti baterya ti lugan na.
Gapu iti daytoy, inpaigid a dagus ti maseknan ti mtorsiklo na kalpasan na ket bimmaba daytoy.
Inpakaammo ni Camalig nga iti met pannakisarsarita da iti maysa a mekaniko ket possible a short circuit kadagiti waya ti motorsiklo ti namonganayan iti pannakauram na.
Nupay kasta, inbatad na nga itultuloy da ti agimbestigar tapno maamoan no ania ti pudno a nakauraman ti motorsiklo.
