LAOAG CITY – Pannakausar ti baro a teknolohia ti eleksion.
Daytoy ti maysa a factor a makita ni Atty. Alipio Castillo III ti Provincial Election Supervisor ti Commission on Elections ditoy Ilocos Norte a posible a mangitunda iti pannakaitantan ti December 2025 Barangay and Sangguniang Kabataan Elections.
Daytoy ti inrakurakna kalpasan nga immun-unan nga inpetteng ti Commission on Elections Central Office a silulukatda ti pannakaitantan ti nasao nga eleksion inton masungad a tawen.
Segun ken ni Castillo a ti sumaruno a Barangay and Sangguniang Kabataan Elections ket manamnama nga adda ti baro a maiyimplementar a makinarya para iti automated election.
Inbatadna nga adda ti baro a software ken hardware a mausar saan a kas iti kallabes a mano-mano laeng.
Inlawlawagna a gapu ta baro amin a mausar ket rumbeng a maipaayan ti Commission on Elections ti naan-anay nga oras tapno makapagsagana ken maadal ti pannakausar dagiti nasao a makinarya tapno maliklikan ti problema nga isu ti makitana a maysa a banag a manglapped ti pannakaisayangkat ti Barangay and Sangguniang Kabataan Elections inton 2025.
Inpettengna a no isuda nga adda iti Field Office ti pagsaludsudan ket umanamongda iti daytoy gapu ta dua nga eleksion ti manarimaan a pagsagsaganaanda a maisayangkat inton sumaruno a tawen banag a marigatanda iti daytoy.
Innayonna a nasaysayaat no maysa nga eleksion ti maiyuswat iti maysa a tawen tapno saan a makompromiso wenno maapektaran ti kalidad iti trabahoda.
