LAOAG CITY – Inrubwat ni President Ferdinand R. Marcos Jr. ti electronic food vouchers kadagiti 750,000 a benepisyaro iti Walang Gutom Program (WGP), tapno mapapigsa ti anti-hunger campaign.
Kabayatan ti pannakairubwat ti Reducing Food Insecurity and Undernutrition with Electronic Vouchers (REFUEL) Project iti San Andres Sports Complex idiay Manila, kuna ni Marcos nga asistiran ti government ti Walang Gutom Program beneficiaries iti panangusar iti digital vouchers.
Segun kenni Marcos, agtultuloy ti panangipaay ti tulong kadagiti umili nga agkasapulan.
Nakibinnulig ti Department of Social Welfare and Development (DSWD) iti Asian Development Bank (ADB) tapno mairubwat ti monthly electronic food vouchers, a gagem na a maipalawa ti sakop ti Walang Gutom Program agingga iti 750,000 households nationwide agingga iti 2026.
Mangipaay ti Walang Gutom Program ti binulan a PHP3,000 electronic food credits kadagiti low-income households.
Kabayatanna, ti PHP74-billion REFUEL Project, maysa a government-led initiative a mangsuporta iti WGP, ket mapondoan babaen iti loan manipud iti ADB ken co-financed ti Agence Française de Développement ken ti Organization of the Petroleum Exporting Countries – Fund for International Development.
Ti kairubrubwat a programa ket gagem na a suportaran ti mission ti Walang Gutom Program a mangpababa iti panagbisin ken mapadur-as ti nutrition manipud 2025 agingga iti 2028 babaen iti food support, behavior change sessions, ken stronger social protection systems.
