LAOAG CITY – Agkidkiddaw ni Mr. Eduardo Arcanses ti Barangay 24 iti San Nicolas, dati a Presidente ti Kristo iti Galyera ken ni Gobernador Matthew Marcos Manotoc a maisubli ti tradisional a wagas ti panagpallot kadagiti galyeraan ditoy Ilocos Norte.
Segun kenkuana, daytoy ket kalpasan a ti maus-usar ket ti betting machine banag nga isu ti pagparikutanda kadagitoy a gundaway.
Inbatadna nga addaan ti nasurok a 200 a miembro ti grupoda a dagitoy ti agserserbi a mangal-ala ti pusta dagiti aficionado a no mangabak dagitoy ket isuda met ti mangted iti porsiento wenno sapul a pangbiag ti pamiliada.
Inlawlawagna a no machine ti mausar kadagiti galyera ket awanen iti pagsapulanda gapu ta daytoy ti kangrunaan a pamastrekanda sipud nagsubli iti operasion dagiti pagpapallutan.
Kunana nga addan dagiti galyeraan a machine ti maus-usar idinto a dagiti dadduma ket tradisional pay laeng.
Inbagana nga aduda a naapektaran iti pannakausar ti “gambling machine” gapu ta adda pay dagiti vendors nga aglaklako kadagiti nagduduma a makan.
Gapu iti daytoy, kuna ni Dela Cruz a maluksawda unay gapu ta arig a mapukpukaw ti pagsapulanda iti galyera a nakairuamanda.
Iti baet daytoy, kunana aa silulukat met ti grupoda a mangawat iti aniaman a maidiaya ti gobierno probinsial kadakuada a sukat ken mabalin a pagsapulanda ngem no mabalin ket maisubli iti tradisional a wagas ti panagpallot kadagiti galyera ditoy Ilocos Norte.
Adda ti siyam a Cockpit Arena ditoy Ilocos Norte pakairamanan ditoy Siudad ti Laoag, San Nicolas, Solsona, Dingras, Vintar, Badoc, Banna, Nueva Era ken iti ili ti Pasuquin.
