LAOAG CITY – Inbatad ni Fr. Joey Ranjo iti St. William Cathedral ditoy siudad ti Laoag a respetaren na ti lungalong ni Sen. Robin Padilla a mangkidkiddaw iti panagbalin a legal ti civil union kadagiti same sex couples.
Nu pay kasta, kuna ni Fr. Ranjo a nu maaprubaran daytoy ken kalikagum a mapagbalin a legal marriage ket saan a mabalin iti biang ti simbaan.
Kuna na a kas daytoy iti nakailanad iti biblya a babai laeng ken lalaki ti mabalin nga agkallaysa.
Segun ken ni Fr. Ranjo, masapol nga agpatingga laeng iti union ken saan a kasar ti panagmaymaysa dagiti same sex couples ken respetaren na ti agbalin a desisyon ti senado.
Innayun ni Fr. Ranjo a masapol latta a masurot dagiti pannursuro ti simbaan.
Kabayatanna, kuna ti padi a sidadaan ti simbaan a mangtratar iti debate ken iti estado seknan ti nasao a banag.
