LAOAG CITY – Inbatad ni Atty. Juanito Antonio a nakadepende iti kamara de representantes ti maipataw a pannusa ken ni Negros Oriental Congressman Arnie Teves nu bilang saan a sumurot daytoy iti naited a bakasyon na.
Nu pay kasta, kuna na a dagiti posible a pannusa ti kongresista ket censure wenno saan a bigbigen ti kamara ti aramid ti opisyal gapu ta saan a napatgan ti naaprubaran a panagbakasyon daytoy.
Mainaig iti daytoy, inbatad ni Antonio a saan nga agtungpal iti expulsion ti congressman nu bilang saan a masurot ti naited a panagbakasyon na.
Kabayatanna, kuna ni Antonio a bayat nga awan ditoy Pilipinas ni Teves ket ti kamara de representantes laeng ti makaipataw ti naan-anay a pannusa.
Maipalagip a saan a pinatgan ni House Speaker Martin Romualdez ti kiddaw ni Teves a maiyalud-od ti panagtalinaed na iti estados unidos manipod iti Pebrero 28 agingga iti Marso 9.
Inpakaammo met ni Department of Justice Jesus Crispin Remulla idi kalman a nakapanawan iti estados unidos ti kongresista ken addan iti Asya.
