LAOAG CITY – Inpakaammo ni Mrs. Evalaudia Duyor, Officer In-charge ti Provincial Assessor’s Office ti gobierno probinsial ti Ilocos Norte a naruay dagiti pakakumikuman ti opisinada iti agdama.
Inpalgakna a malaksid iti inaldaw nga ar-aramidenda a panangtingiting ken panangaprobar wenno panagiyisyu iti “tax declaration” kadagiti agtagikua iti daga ket adu pay dagiti maibalballaet nga aktibidadda nga aggapo iti ngato.
Malaksid iti daytoy, inbunannagna a ti kangrunaan a pakakumikumanda iti agdama ket dagiti kiddaw dagiti Local Government Units wenno LGU’s a panangisayangkatda ti “appraisal” kadagiti lote a “subject for acquisition”.
Segun kenkuana, masapul ti “appraisal report” tapno maala dagiti maseknan ti kuarta a maibayad kadakuada ti panaglakoda iti daga.
Inbatadna nga arigna tallo a kiddaw ti maaw-awatda manipud iti nagduduama nga ili ditoy probinsia iti kada lawas.
Kunana a daytoy ti kangrunaan a rason a masansan nga adda dagitoy iti ruar ti opisinada.
Kabayatanna, inlawlawag ni Duyor a mainayon pay iti trabaho da ti ipapaayda a technical assistance kadagiti Local Government Unit a nagreretiro dagiti municipal assessor’s-da.
