LAOAG CITY – Saan a kukua ti pamilia Marcos ti Paoay Complex.
Daytoy ti inrakurak ni Atty. Domingo “Egon” Cayosa, dati a Presidente ti Integrated Bar of the Philippines.
Segun kenkuana, daytoy ket kalpasan a dimmalan iti umiso a proseso ken adda ti umdas nga ebidensia ti Korte Suprema no sadinno naduktalanda a ti nakaipatakderan ti Malacañang of the North ket paset ti National Park.
Inbatadna a no National Park ket maibilang kas public land wenno public property a saan a mabalin a maikkan ti titulo ken tagikuaen ti maysa a pribado nga indibidual.
Inlawlawagna a maibasar iti Korte Suprema a saan a mabalin a maaddaan ti lease agreement iti nagbaetan ti pamilia Marcos ken ti Philippine Tourism Authority gapu ta saanda met a kukua dagiti nasao a sanikua.
Kunana a maipawil iti Konstitusion a dagiti Presidente ken dagiti nangangato nga opisial ti gobierno ket saanda a mabalin a makikontrata iti ahensia ti gobierno para iti bukudda nga interes.
Mainaig iti daytoy, inpakaammo ni Atty. Cayosa a basar iti Korte Suprema a nasken a ti Department of Environment and Natural Resources ken ti Office of the Solicitor General kas Lawyer of the Republic of the Philippines a rumbeng a makanselar dagiti free patent no sadinno nga highly irregular ti pannakaiyisyu iti daytoy.
Kabayatanna, naammoan a mabalin nga agsungbat dagiti adda iti likudan ti pannakaiyisyu ti free patent iti Paoay Complex.
Immuna iti daytoy, inyetnag ti Korte Suprema ti desision a ti Malacañang of the North ket maibilang nga ill-gotten wealth ti pamilia Marcos.
