LAOAG CITY – Indauloan ni Archbishop Charles John Brown, ti Papal Nuncio to the Philippines ti misa iti Saint John the Baptist Minor Basilica iti ili ti Badoc.
Daytoy ket kas paset iti maika-436 nga anibersario iti pannakaselebrar ti Parish Fiesta ita nga aldaw.
Segun kenkuana, ti maysa kadagiti kangrunaan a naobserbaranna ket ti natibker a pammati iti Dios dagiti deboto a katoliko ken ti nabara a panangpasangbay kenkuana dagiti umili ditoy Ilocos Norte.
Inbatadna nga isuna ti inpatulod ni Pope Francis manipud idiay Vatican a mangibagi kenkuana iti pannakaiyuswat ti naindaklan ken naisangsangayan nga aktibidad.
Inpakaammona nga adda ti manamnama a panagbiahe ti Pope Francis iti Southeast Asia pakairamanan ti Singapore inton Setiembre.
Kalikagumna a makabisita ti Santo Papa ditoy Pilipinas para iti maikadua a gundaway gapu ta naudi nga immay ditoy pagilian ket idi pay laeng 2015.
Kunana a daytoy ti umuna a gundaway a bumisita isuna ditioy pagilian.
Mainaig iti daytoy, naammoan a kalpasan ti misa iti Saint John the Baptist Minor Basilica iti ili ti Badoc ket nagturong ti Papal Nuncio to the Philippines iti Barangay Uguis iti ili ti Nueva Era para iti pannakaiyuswat ti Christ the King ita a tawen ken dumagas iti Bishops Residence ditoy siudad ti Laoag sakbay nga agawid.
Kabayatanna, naipaayan ti naiget a seguridad ti Papal Nuncio to the Philippines babaen kadagiti kameng ti Philippine National Police kabayatan ti kaaddaana ditoy baluarte ni Presidente Ferdinand Bongbong Marcos Jr.
