LAOAG CITY – Naiget nga ipatungpal ni Presidente Ferdinand Marcos Jr. ti panangipawil iti pannakipaset dagiti pulitiko iti panangipaay ti cash ken dadduma pay a tulong pinansial iti babaen ti 2026 General Appropriations Act (GAA).
Segun iti Presidente, ti pundo ti gobierno ket nasken a direkta a maipaay kadagiti benepisiario ken saan a mausar iti panangpulitika.
Inpetteng ni Marcos a ti panangipaay ti ayuda ket dumalan laeng kadagiti ahensia ti gobierno tapno maliklikan ti patronage politics ken masigurado a buo ken husto ti maawat dagiti umili.
Sakupen daytoy a pagannurotan dagiti programa nga Assistance to Individuals in Crisis Situation (AICS), Tulong Panghanapbuhay sa Ating Disadvantaged/Displaced Workers (TUPAD), Pantawid Pamilyang Pilipino Program (4Ps) pakairamanan ti cash grants ken pension para kadagiti senior citizen ken persons with disabilities.
Kagiddan daytoy, pappapigsaen met ti 2026 national budget ti Local Government Support Fund tapno masuportaran dagiti proyekto dagiti lokal a gobierno iti panagbiag, panagdur-as ken kinatalged ti komunidad.
Inpetteng ti Presidente a maipatungpal ti nailian a pundo maiyallubog kadagiti maipatpatungpal a linteg ken pagannurotan.
Gapu iti daytoy, adda dagiti sumagmamano a pundo ti maipadalan iti conditional implementation pakairamanan para iti pension, capacity development programs, foreign service posts ken sumagmamano a social ken infrastructure programs.
