LAOAG CITY – Maysa a parke iti Nagaizumi, Shizuoka Prefecture ti opisialen a binigbig kas “Smallest Park in the World” basar iti Guinness World Records.
Ti parke ket adda laeng ti kalawana a 2 1/2 square feet nga agarup kadakkel ti family-size pizza.
Nangrugi ti ideya ti parke idi 1988 kalpasan a bimmisita idiay Estados Unidos ti maysa kadagiti construction management division employee ti Nagaizumi city hall.
Babaen iti daytoy, nakitana ti Mills Ends Park iti Portland, Oregon. Naaprisiarna ti kinasobra a kinabassitna nga adda ti rukudna a 3.1 square feet.
Idi nagsubli idiay Japan, insingasingna a mangaramid ti nabasbassit a bersion daytoy iti lugarda ken insigidada nga inaramid.
Naammoan nga uray nalpasen ti parke idi pay 1988, saan daytoy nga naisubmitir iti Guinness World Records. Idi Disiembre laeng naiyuswat ti opisial a panangberipikar a nangipaay ti baro a titulo ken ni Nagaizumi.
Basar iti lokal a gobierno, gagemda nga agtultuloy nga itaripato ti parke ken aramiden kas “social media friendly” tapno ad-adu a tattao ti maallukoy a bumisita iti lugar.
