LAOAG CITY – Inpakaammo ni Jail Warden Edietor Guiang a mai-display dagiti parol nga aramiden dagiti balud ti Ilocos Norte Provincial Jail kadagiti nagduduma nga ahensia ti gobierno.
Segun kenkuana, nakasaganan dagiti amin a kagamitan a mausar para iti panagaramid ti parol dagiti balud.
Inbatadna a nayon a pamastrek dagiti balud ti panagaramidda ti parol kagiddan iti umas-asidegen nga holiday season.
Inlawlawagna a tinawen daytoy nga ar-aramiden dagiti balud kas paset iti panangselebrar ti pudno nga anag ti paskua.
Kunana nga uray adayo dagiti balud kadagiti bukudda a pamilia ket saanda malipatan ti selebrasion ti paskua.
Innayonna a manamnama nga adunto dagiti maawat nga order dagiti balud maysa a bulan sakbay iti Disiembre.
