LAOAG CITY – Maysa a 4-year-old parrot a sikat iti online ti nakagun-od ti world record gapu iti talento daytoy a makabigbig kadagiti nagduduma a banag.
Kinumpirmaran ti records keeping organization a Guinness World Records a ti African Gray Parrot a ni Apollo ti baro a record holder ti titulo a “Most Items Identified by a Parrot in 3 minutes.”
Daytoy ket kalpasan a maka-identify ti 12 items iti uneg ti tallo a minuto no sadinno sumagmamano kadagiti nabigbig ni Apollo ket libro, medyas ken tinapay.
Basar kadagiti agasawa nga isuda Dalton ken Victoria Mason nga agtagikua ken ni Apollo, na-train-da daytoy babaen iti wagas nga inpablaak ni Irene Pepperberg, maysa nga animal psychologist.
Malaksid iti panagbalinna a nasirib a parrot, ni Apollo ket sikat iti online no sadinno addaan daytoy ti 2.8 million followers iti TikTok ken 1.37 million subscribers iti YouTube.
