LAOAG CITY – Nabara ti ummuna nga aldaw ti panagkakampanya para iti Barangay ken Sang. Kabataan Election iti Barangay iti 50 Buttong ditoy ciudad ti Laoag gapo iti panagriri dagiti dua a partido nga agkalaban.
Daytoy ket kalpasan a nagrarana da iti Sitio 5 iti nasao a barangay bayat ti panagkampanya da ken pannakaisayangkat ti motorcade.
Segun kenni Mr. Lincon Bonoan, kabsat ti kandidato iti kina-kapitan a ni Kagawad Maureen Bonoan, pabpabasolen da a kinugtaran na ni Kagawad Danny Juan.
Nupay kasta, inpetteng na nga induron na laeng daytoy gapo ta maipagarop a linaputan (dirty finger) ni Kag. Rudy Domingo ti kabsat na a ni Kag. Maureen Bonoan.
Inpalgak na pay a saan na a kabaelan a kugtaran daytoy gapo ta addaan ti arthritis ken marigatan pay a makapagna.
Naamoan a dagiti dua a partido ket agpinpinnabasol no siasinno ti ummuna a dimmarop kadakuada gapo ta kadagiti impormasyon ket rumuar kuman iti Sitio 5 ti grupo ni Barangay Chairman Jessie Bonoan ngem narana da ti grupo ni Kag. Maureen Bonoan a mangiyus-uswat ti motorcade.
Mainaig iti daytoy, naglikudan met ni Kag. Domingo nga adda ti inbaga na a maatiw ni Kagawad Bonoan iti kina-kapitan.
Malaksid iti daytoy, kwinestyunaran met ti Pamilya Bonoan ti pannakaposas ni Mr. Bonoan iti laksid nga awan pay ti warrant of arrest na.
Kabayatanna, napan met nagpamedical ni Mr. Lincon Bonoan gapo ta manamnama a mapilaan daytoy ti Physical Injury gapo iti maipagarop nga inaramid na.
Inlawlawag met ni Police Lt. Col. Joseph Baltazar, ti chief of police ti Philippine National Police ditoy ciudad nga iti panagimbestigar da ket nagsisinnabat dagiti dua a partido ken ditoy nga adda ti panagsisinnungbat.
Kunana pay a naposasan ni Mr. Lincon Bonoan gapo iti pannakaitudo na a maipagarop a nagkugtar ngem nailawlawag met laeng ken naikkat ti posas na.
