LAOAG CITY – Nabilin ti partido ni Solsona Mayor Joseph De Lara ken ni Sang. Bayan Member Jovencio Pascual et al a mangisubmitir ti position paper.
Daytoy ket kabayatan ti pannakatratar ti kaso administratibo nga inpiladagiti sumagmamano a kameng ti Sang. Bayan iti Solsona kontra iti Mayor.
Manamnama nga isubmitir dagiti dua a partido ti position paper iti uneg ti 15 nga aldaw.
Inpetteng ni Atty. Crisostomo Cachapero, legal counsel da SBM Pascual a masapol a maipadalan iti preventive suspension ni De Lara tapno saan a maimpluwensyaan dagiti maisubmitir nga ebidensya.
Inbatad na a no agtultuloy nag agreport iti agtrabaho ti mayor ket saan a makaisubmitir dagiti department heads kadagiti kasapulan a dokumento para iti pannakaaprubar ti budget ti Solsona.
Kabayatanna, inpetteng met ni Atty. Ferdinand Agustin, ti legal counsel ni De Lara a nangipila da ti motion to defer proceedings gapo ta adda ti inpila a mandamus case iti Regional Trial Court.
Kunana a posible a maapektaran ti desisyon ti RTC no bilang addan ton ti desisyon ti Sang. Panlalawigan seknan iti nasao a kaso administratibo rason a kalikagom da a maikkan ti waya a matratar ti inpila da a mandamus case.
Kabayatanna, inbatad ti partido ti complainant a saanen a kasapulan pay ti pormal nga imbestigasyon gapo ta ti kangrunaan laeng nga isyu a madiskutir ket adda ti pakainaigan na iti linteg.
Kalikagom met ti partido ti respondent a paayaban ti SB Secretary ti Solsona iti Sang. Panlalawigan tapno agbalin a testigo a saan nga inaprubaran SB ti Resulotion No. 2020-335.
Maipalagip a namunganay ti kaso administratibo a naipila kontra iti mayor iti saan na a pinatgan a mapaayaban dagiti department heads tapno pagsaludsudan ti Sang. Bayan kadagiti nagduduma a proyekto a nakaigastoan ti covid-19 fund.
Nupay kasta, adalen pay laeng a nalaing ti Sang. Panlalawigan para iti naan-anay a pannakatratar ti nasao nga isyu.
