LAOAG CITY – Agtultuloy ti panagresponde dagiti kameng ti Bureau of Fire Protection (BFP) iti maysa a pasdek negosyo a nauram iti Purok 2 iti Brgy. Albano iti ili ti Dingras.
Segun ken ni Major Roxanne Parado, ti Deputy Provincial Director iti BFP, nasurok 10 a firetruck manipod iti nagduduma nga ili ti agtitinnulong a mangsebsebseb ti apoy.
Kuna na a kasapulan ti ado a pwersa dagiti kameng ti BFP gapu iti kapigsa ti uram.
Immuna iti daytoy, inpakaammo ni Parado a ti nasao a pasdek negosyo ket dati a pagtaengan ken napagbalin a pasdek negosyo.
Inbatad na a karaman a nauram ti panaderia, general merchandise, glass and aluminum supply ken pagdaydayawan nga adda iti maikadua a kadsaaran.
Mainaig iti daytoy, inbatad na nga awan met a pulos ti naisalbar a ramit manipod kadagiti pagtagilakuan.
Nu pay kasta, kuna ni Parado a ti pagsayaatanna ket awan ti nadangran iti nasao nga uram.
Kabayatanna, agpapan a maisursurat ti damag ket saan pay a niyatablisar ti kabuklan a balor ti danyos iti nasao nga uram ken ti posible a namunganayan daytoy.
