LAOAG CITY – Manarimaan ti pannakaiwayat ti imbestigasion maipanggep iti maipagarup a pannakatay ti maysa a pasiente kalpasan nga awan ti nasangpetanda a tao iti Barangay Pancian Pagudpud Extension Hospital.
Segun ken ni Dr. Rogelio Balbag, Executive Director ti Hospital Management Council ti gobierno probinsial ti Ilocos Norte, limitado laeng ti maipapaay a serbisio medikal iti nasao nga ospital kas ti Outpatient Department ken Emergency Room maidasig kadagiti dadduma a District Hospital ditoy probinsia.
Inbatadna a nakatutok ni Dr. Alcoriza, mangidadaulo ti Bangui District Hospital pakaseknan iti nasao nga insidente.
Kunana a kasapulanda pay nga imbestigaran no adda ti kinapudnona ti maipagarup a naka-lock wenno nakarikep ti ospital ken rumrummuar nga awan ti ambulansia idi naitaray ti pasiente.
Inlawlawagna a 24 nga oras ti serbisio ti ospital manipud iti Lunes agingga iti Biernes nga adda dagiti naka-duty a doktor, nurse ken dadduma pay a medical personnel.
Mainaig iti daytoy, inpetteng ni Dr. Balbag a saan a nasken nga i-lock wenno irikep ti ospital gapu ta masapol a maiserrek dagus ti pasiente tapno mataming.
Kabayatanna, inpakaammo ni Brgy. Chairman Jessie Chris Lagundino ti Brgy. Pancian iti ili ti Pagudpud nga agarup alas diyes ti rabii ket naitaray iti ospital ti maseknan a pasiente.
Nupay kasta, inpalgakna a nabayag a nagtuktuktok ti pamilia ti pasiente iti ridaw ti nasao nga ospital.
Kunana nga uray laeng nagbusbusina ti nagluganan ti pasiente tapno luktanda ti ridaw ti ospital.
Gapu iti daytoy, adda ti rimmuar a tao ngem imbes a tulunganna ti pasiente ket arig binuybuyana pay daytoy.
