LAOAG CITY – Inbatad ni Mr. Jan Dancel, ti Tourism Officer iti ili ti Pasuquin nga awan ti naawat na a request letter para iti pannakaisayangkat ti pasken iti maysa nga inn wenno hotel iti nasao nga ili.
Nupay kasta, kuna na nga adda ti naawat ti opisina ti mayor a surat mainaig iti daytoy a banag ngem naamoan na a saan a naaprubaran daytoy.
Inbaga na a saan na metten a nakita ken nabasa ti linaon ti nasao a surat.
Inadmitir pay ni Dancel nga addan dagiti nagkiddaw kadakuada para iti pannakaiwayat ti pasken ngem saan da nga inaprubaran gapu ta saan a kayat ti mayor iti nasao nga ili.
Immuna iti daytoy adda dagiti nagreklamo iti Bombo Radyo mainaig iti pannakaangay ti pasken iti maysa nga inn wenno hotel iti nasao nga ili a nagatendaran ti ado a tattao.
Kabayatanna, inlawlawag ni Miss Mary Jane Pagurayan, manager iti restaurant a nakaiwayatan ti birthday party ni Mr. Benley Academia iti ili iti Pasuquin nga umabot amin ti 37 a tattao dagiti nagatendar iti nasao a pasken.
Nupay kasta, inpasingked na a saan a naggigiddan a simrek dagiti tattao no di ket adda ti umuna agingga iti maikapat a batch no sadinno a kalpasan a nangan ti umuna a batch ket nagawid da a dagus kastoy met kadagiti simmaruno a batch.
Malaksid iti daytoy, sakbay a pinastrek da dagiti nagatendar ti pasken ket inalaan da dagitoy ti temperatura, pinagusar da ida ti face mask, face shield ken nag-alcohol dagitoy.
Inpasiguradao met ni Pagurayan a nasurot ti social distancing gapu ta adda dagiti kakadwa da a nagbantay tapno masiguradao a saan a makapagdedeppet dagiti maseknan.
Innayon na a ti umuna ken maikadwa a batch ket nagpaot da laeng iti uneg ti venue iti agarop 20 a minutos idinto a dagiti naud-udi a batch ket arigna awan pay ti 15 a minutos gapu ta agal-alisto da.
Mainaig iti daytoy, inbatad ni Pagurayan nga idi dinamag na ken ni Academia no adda ti pammalubos ti munisipyo iti panagselebrar na ti kasangay na iti imatmatonan na a restaurant ket nag-wen daytoy.
