LAOAG CITY – Inlawlawag ni Police Lt. Col. Amador Quiocho, ti chief of police ditoy ciudad ti Laoag ti maibunong a Pass slip kadagiti residente tapno makarwar da a mapan gumatang ti kasapulan iti uneg ti balay.
Daytoy ket kalpasan a naipatungpal ti Enhanced Community Quarantine iti intero a Luzon gapu iti agtultuloy a panagngato ti kaso ti Coronavirus ditoy pagilyan.
Inbatad na a ti pass slip ket alaen dagiti residente iti barangay hall ken tunggal rumuar da ket masapol nga adda ti pirma ti kapitan iti ayan da a barangay gapu ta isu ti ipakita da kadagiti kameng ti pulisya a mangiyus-uswat ti checkpoint iti nagduduma a lugar.
Segun kenkuana, saggaysa laeng a pass slip ti maited ti kada pamilya ken maysa laeng a miembro ti mapalubusan a rumuar a mapan gumatang ti kasapulan iti uneg ti balay da.
Inbaga pay ni Quiocho a ti pass slip nga inusar koma ita nga aldaw ken saan a mabalin nga usaren iti sumaruno a papan panag-grocery, panagirwar ti kwarta wenno panaggatang ti agas.
Kabayatanna, inbatad pay ni Quiocho a maipalubos nga adda ti lima a tricycle nga agbiyahe iti kada aldaw ditoy ciudad ti Laoag.
Innayon na a masapol nga agsusublat lattan dagiti traysikelan nga agpasada iti kada aldaw.
Nupay kasta, kuna ti opisyal a masapol a malimitaran ti bilang dagiti residente a rumuar iti kada aldaw tapno maliklikan ti panagdudupudop dagiti ado a tattao iti sentro ditoy ciudad.
