LAOAG CITY – Ballaigi ti naisayangakat a search wearrant operation iti pagtaengan ti agnagan iti Manuel Ambida y Valdez, addaan iti umno a tawen,Pastor iti maysa a sekta ti relihiyon ken residente iti Brgy Talugtog iti ili ti Solsona.
Ti nasao nga operasyon ket seknan iti panagsalungasing iti RA 10591 wenno Comprehensive Law on Firearms and Ammunition ken inwayat daytoy ti napagtitipon a puwersa ti PNP-Banna, PNP-Solsona, ken ti INPPO.
Naala iti ikot ni Ambida dagiti sumaganad, 17 a bala ti 12 gauge shotgun, 60 a bala ti cal 45, 8 nga special a bala ti cal 45, 2 a supressor ti shotgun, maysa a shotgun ken maysa a cal. 45 a paltog ken maysa a bala ti cal 5.56mm.
Nakasagana met daytoy nga agsungbat iti aniaman a maipila a reklamo kontra kenkuana.
Sabali pay a ballaigi a search warrant operation ti inwayat ti PNP-Dingras ken nakitinnulungan ti INPPO.
Dua a mapagat-atapan a drug personality ken drug surenderee iti nakaiwayatan ti nasao nga operasyon.
Nabigbig dagitoy a da Aldemar Taylan, addaan ti umno a tawen, naasawaan, maysa a negosyante ti “on line”, ken agkaskasera iti Bgy. Madamba ken ni Dante Aguinaldo, agtawen ti 49, naasawaan, maysa a mangisursuro, Pastor ti masya a sekta ti relihiyon ken residente iti Bgy. Parado.
Naala iti pagkaskaseraan ni Taylan ti dua a dadakkel a pakete a naglaon iti maatap a shabu, maysa a bassit a sachet a naglaon iti maatap a shabu residue, ken 11 a pedaso ti bala para iti kalbre 45 a paltog ken iti “family house” da iti Bgy. Guererro ket nakaala da iti 2 a dadakkel a pakete a naglaon iti napagango a maatap a bulong ti marijuana.
Idinto a ti pagtaengan ni Aguinaldo ket naala met ti tallo a babasit a pakete a naglaon iti maatap a napagango a bulong marijuana, sabali pay a lima a panakkelen a pakete a naglaon iti maatap a shabu, 20 a bala ken accessories kas iti magazine ken teleskopyo para iti caliber 9mm a paltog.
Agpadpada da Taylan ken Aguinaldo nga awan ti ammo da dagiti naala kadakuada ken ipetpetteng da a naimuala dagitoy gapu ta immuna nga adda simrek kadagiti pagtaengan da kasanguanan a naiwayat ti operasyon.
Kabayatan na, ballaigi met ti naisayangkat a search warrant operation idiay ili ti Pinili.
Subject ti operasyon ni Benny Bulibol y Yasay agtawen ti 31, addaan ti live-in partner, mannalon ken residente iti Bgy. 16 Salanap ti nasao nga ili.
Narekubre ti grupo ti maysa nga M-16 armalite rifle, lima a magazine ti nasao a klase ti paltog, ken nagdduma a klase ti bala para iti 7.62 mm, m16, 9mm ken cal 40.
Mainaig iti daytoy, inbaga ni Bolibol nga adda lisensiya ti paltog na isu laeng nga expired ti LTOPF na.
Ni Bolibol ket napagat-atapan a miyenbro ti “gunfor hire” a daytoy ita ti palawlawagan ti PNP.
Natiliw pay iti naisayangkat a search warrant operation idiay ili ti Badoc gapu iti panagsalungasing na RA 10591 wenno Comprehensive Law on Firearms and Ammunition Act, da Bernardo Cabilles Jr., Jay Glenn Galang, Gerardo Ordanel, Wendel Dagupion, Zosimo Gamponia agpapada a taga Bgy. Saud, Edmund Raquiño iti Bgy. Lacuben ken Perfecto Salmasan iti Bgy. Camanga.
Naala iti pagtaengan ni Cabilles ti dua a paltog nga snubnose ken 38 caliber ken balbala, ni Galang ket rifle grenade, ni Dagupion maysa nga improvised a shotgun, rifle grenade, sumagmamano a bala, ni Gamponia ket kalibre 38 a paltog ken balbala idinto a da Raquino ken Ordanel ket negative ken ni Salmazan ket lisensiyado ti kalibre 45 a paltog na.
Dumalan ti eksaminasyon dagiti naala a paltog ken balbala ken no no adda agriri iti wagas a pannakaoperar da ket nakasaga ti PNP nga agsungbat.
