LAOAG CITY – Inrakurak ti Philippine National Police (PNP) a nagkiddaw ti motion ti legal counsel ni Kingdom of Jesus Christ leader Pastor Apollo Quiboloy tapno dumalan daytoy iti hospital arrest idiay Davao City.
Segun ken ni Philippine National Police Spokesperson PCol. Jean Fajardo a nag-file ti “motion to be transferred to a hospital in Davao City” iti Pasig Regional Trial Court Branch 159 dagiti abugado ni Quiboloy.
Basar iti motion nga inpila ti kampo ni Quiboloy, kalikagumda nga iyakar ti Pastor ken maysa pay nga akusado a ni Ingrid Canada iti Veterans Memorial Medical Center idiay Davao gapu ta marigatan dagitoy iti custodial facility iti Kampo Krame gapu iti marikriknada a sakit.
Inbatadna nga agtalinaed ni Quiboloy iti custodial facility ti Philippine National Police kabayatan a nakapenpen ti kiddaw nga hospital arrest.
Inbilin ti korte ti Philippine National Police a tutukan ti medical check-up da Quiboloy ken Canada pakairamanan dagiti government doctors.
Kabayatanna, nangipila ti comment-opposition ti Department of National Defense (DND) idiay Quezon City Hall of Justice tapno lappedan ti pannakaiyakar iti kustodiar ni Quiboloy.
Inlawlawag ni Department of National Defense Assistant Secretary ken Chief of Legal and Legislative Affairs Atty. Erik Lawrence S. Dy, dagiti kaso a sangsangoen ni Quiboloy ken dagiti padana nga akusado ket ‘heinous crimes’ a sakupen ti hurisdiksion ti Civil Court ken saan a pammilin ti Armed Forces of the Philippines nga alen iti kustodiar dagiti suspek a karaman kadagiti criminal case.
Innayonna a nupay adda dagiti detention facilities iti uneg ti Kampo Aguinaldo, adda ti masursurot a naiget a security protocol ken nairanta laeng kadagiti kameng ti Armed Forces of the Philippines nga addaan ti kaso iti General Courts Martial.
