LAOAG CITY – Inlawlawag ni Police Staff Sergeant Melmar Antonio iti PNP Traffic Division ditoy ciudad ti Laoag a saan nga intarayan ti patrol car ti lalaki a nakalugan ti motorsiklo kalpasan ti desgrasya iti Suba Road, Barangay Cabungaan-A ditoy ciudad.
Segun kenni Antonio, ti driver ti motorsiklo ket agtawen ti 38, maysa a construction worker ken residente iti Barangay Gabu Sur ditoy ciudad.
Iti imbestigasyon dagiti kameng ti PNP Traffic Division, agpaabagatan a direksyon ti patrol car ken agovertake kuma ngem adda ti masabat na a lugan isut gapo na a nag-slowdown.
Nupay kasta, kunana a mabalin a saan a napakadaan daytoy ti driver ti motorsiklo a sumarsaruno iti patrol car isut gapo na a nadungpar na ti likudan ti patrol car.
Gapo iti daytoy, nagsagaba ti driver ti motorsiklo ti minor injuries ken nadadael ti sango ti lugan na idinto a ti patrol car ken gasgas laeng.
Inbatad ni Antonio a nagresistir ti driver ti motorsiklo a maipan isuna iti ospital ngem inpilit ti driverti patrol car a tumawag iti ambulansya.
Kunana nga idi simmangpeten ti ambulansya ket pimmanaw metten ti patrol car gapo ta adda ti mapan na sukunen.
Kabayatanna, kuna ni Antonio a ti mabalin da nga ipila kontra iti driver ti motorsiklo ket reckless driving.
