LAOAG CITY – Nangabak ni Paul Biya nga agtawen ti 92 a Presidente idiay Cameroon.
Daytoy ti maikawalo a termino ni Biya kas Presidente iti nasao a pagilian.
Agserbi ni Biya iti maikawalo a nagsaruno a terminona a nangrugi a nagturay idi 1982 ken isuna ti maibilang a kataengan a mangidadaulo iti estado iti intero a lubong.
Indeklarar met ti opposition leader a ni Tchiroma Bakary a nagballigi kagiddan ti panangirakurakna a ti Constitutional Council ti mangianunsio ti resulta.
Naruay a tattao ti madandanagan ken maam-amak kadagiti kalsada iti Bamenda city gapu kadagiti riribuk a mapaspasamak.
Adda ti uppat nga indibidual ti pimmusay gapu iti riribuk a nagbaetan dagiti security forces iti commercial hub ti Douala.
Maipalagip a ginasut a protesters ti nakaengkwentro dagiti security forces iti sumagmamano a siudad idiay Cameroon, maysa nga aldaw sakbay a naiparuk-at ti resulta ti pagriririan a presidential election.
Immuna iti daytoy, ipetpetteng dagiti protesters a nangiwayatda ti nadamsak a tignay-protesta tapno kondenaren ti plano ti rulling party a Cameroon People’s Democratic Movement (CPDM) nga agawen ti balligi manipud iti opposition leader.
