LAOAG CITY – Inrakurak ti World Bank nga inaprobaranna ti multi-million dollar loan tapno pundoan ti flagship infrastructure project ti gobierno ditoy Pilipinas a gagem a mapasayaat ti broadband connectivity iti intero a pagilian.
Inbatad ti World Bank nga inaprobaran ti Board of Executive Directors ti $287.24 milyon a pundo para iti Philippine Digital Infrastructure Project (PDIP).
Inaprobaran ti National Economic and Development Authority (NEDA) Board ti P16.1-billion Philippine Digital Infrastructure Project idi Hunio.
Ti proyekto ket inisyatibo ti Department of Information and Communications Technology (DICT), karaman ti pannakaiyestablisar ti public broadband infrastructure network.
Bukbuklen ti network ti lima a major components, ti backbone network, middle-mile network, access network (last-mile), network security ken project management support.
Inlawlawag ti World Bank a nasurok 20 a milyon a Pilipino ti mabenepisiaran manipud iti napinpintas nga internet connectivity babaen iti Philippine Digital Infrastructure Project.
