LAOAG CITY – Pinalubusan dagiti agkalkalap iti Bgy. Saud iti ili a Badoc ti nakalapan da a pawikan kalpasan a naikkan ti “tag” ken kalpasan na nakita nga adda ti natalged a situasyon.
Segun ken ni Mr. Arthur Valente Prov’l Fishery and Regulatory Officer ti Prov’l Agriculture Office, nadaklisan dagiti agkalkalap ti nasao a pawikan a babai itay bigat.
Kuna na a mabalin a nagpaigid ti pawikan gapu ta agitlog gapu ta kadagitoy a tiempo ti panaggiitlog dagiti nasao a nabiag ti baybay.
Mamati ni Valente nga iti laksid a pinalubusan da ket posible a tumakdang tapno agitlog.
Ti nasao a pawikan ket mapattapatta nga agdagsen iti 75 agingga iti 80 a kilos ket addaan iti kaddakkel a 93 a centimetro iti kaatiddog ken 81 a centimetro ti kaakaba na.
Ibilang dagiti taga Saud nga isu pay aleng ti kadadakkelan a nakalap da a pawikan sipud 2010.
