LAOAG CITY – Agtalinaed a nakatutuk ni Presidente Ferdinand Marcos Jr. iti panangidanun ti serbisyo iti publiko iti baet ti panagngato ti satisfaction rating na.
Segun ken ni Palace Press Officer Undersecretary Claire Castro, saan a naapektaran ti resulta dagiti survey ti presidente ken agtalinaed a nakatutuk daytoy iti panagtrabaho na para kadagiti Pilipino.
Basar iti kaudian a Social Weather Stations (SWS) survey, ngimmato iti 38% ti satisfaction rating ni Marcos iti maikadwa a quarter ti 2026 manipod iti 33% idi Marso, idinto a bimmaba iti 45% ti dissatisfaction rating manipod iti 49%.
Innayon ni Castro nga agserbi a pagibasaran laeng dagiti survey iti administrasyon tapno maestablisar dagiti programa a rumbeng a pasayaaten.
