LAOAG CITY – Binilin ni Presidente Ferdinand R. Marcos Jr. dagiti law enforcement ken anti-corruption entities a mangipatungpal ti naiget nga operasyon kontra kadagiti Philippine Offshore Gaming Operations (POGOs) nga agop-operar pay laeng ditoy Pilipinas.
Daytoy a direktiba ti Presidente ket kagiddan ti maikadua a miting ti Joint National Peace and Order Council (NPOC)-Regional Peace and Order Councils (RPOCs) 2024, a naangay iti Camp Crame.
Kalikagom ti Presidente a papigsaen ti kampania ti Philippine Anti-Organized Crime Commission (PAOCC), ti Philippine National Police (PNP), ken ti Criminal Investigation and Detection Group (CIDG) kontra kadagiti POGO hub ditoy pagilian.
Binilin pay ti Presidente dagiti local chief executive a makikoordinarda iti Department of the Interior and Local Government (DILG) tapno mangisayangkatda ti naiget nga imbestigasion no adda POGO nga agop-operar iti sakupen da, nangruna dagiti local government units nga addaan ti kabaelan a mangilasin kadagiti mapagduaduaan wenno illegal nga aktibidad iti komunidadda.
Iti agdama, umaboten iti 53,700 nga offshore gaming employment licenses ti kinanselar ti gobyerno.
