LAOAG CITY – Binilin ni Presidente Ferdinand Marcos Jr. ti Department of Agriculture (DA) ken Bureau of Customs (BOC) a paigetanda ti panangipatungpal ti Anti-Agricultural Sabotage Act nangruna ita a panawen ti bakasion.
Segun iti presidente, aramiden ti gobierno ti amin tapno bumaba ti presio ti taraon ken saanda a pulos a palubosan dagiti mananggundaway a negosiante kadagiti illegal nga operasyon da.
Inpetteng ti presidente a rumbeng a protektaran ti interes ti publiko kontra iti nangato a presio dagiti tagilako, isu a rumbeng a matiliwen dagiti karama iti smuggling.
Kabayatanna, inpasigurado ti gobierno a saan da nga itulok nga agtultuloy dagiti saan a maiparbeng nga aktibidad ditoy pagilyan.
