LAOAG CITY – Gagem ni Presidente Ferdinand Marcos Jr., nga awanen ti Pilipino nga agbisin isut gapuna a kinidddaw na ti whole-of-nation approach tapno masolusyunan ti nasao a problema.
Inrakurak daytoy ti presidente iti pannakaiyuswat ti “Walang Gutom Awards” para kadagiti local government units nga addaan ti naidumduma nga addang tapno masolusyunan ti problema seknan ti panagbisin iti masakupan da a lugar.
Inbatad ni Marcos a masapol nga agtipon ti pwersa ti gobyerno, private sector, non-profit organizations ken uray ti international community tapno masolbar ti problema iti panagbisin.
Ti Walang Gutom Award kt indaulwan ti Department of Social Welfare and Development (DSWD) ken Galing Pook Foundation no sadinno a 17 a Local Government units ti napadayawan kas best performing Local Government Units (LGUs) iti pananglaban ti panagbisin ken malnutrition.
Inpalgak ni Presidente Marcos a dakkel a banag dagiti addang dagiti Local Government units iti national government a gagem na a matuldukan ti panagbisin iti pagilian kangrunaan na iti vulnerable sector.
Inpasigurado ni Presidente Marcos nga aramiden amin ti gobierno na ti amin a wagas tapno malabanan ti panagbisin iti pagilian.
Maipalagip a pinirmaan ni Presidente Marcos iti napalabas a tawen ti Executive Order No. 44 wenno ti “Walang Gutom 2027: The Food Stamp Program kas maysa kadagiti flagship programs ti Marcos Jr., administration.
