LAOAG CITY – Ginutigot ni Presidente Ferdinand Marcos Jr. dagiti baro a naipromote nga heneral ti Armed Forces of the Philippines nga agtultuloy a mangidaulo nga addaan ti integridad ken pagtalinaeden a nadalos ti nagan ti armada.
Inaramid daytoy ti presidente iti oath-taking ceremony ti 37 a newly promoted AFP Generals iti Palasyo ti Malakanyang.
Pinatibker manen ti presidente ti agtultuloy a natalged a panangidaulo ken nalawag a gagem ti Armed Forces of the Philippines (AFP) tapno agtalinaed a nakasagana, nakapapati ken napudno iti panagserbi iti umili.
Kagiddan ti panagpirma iti 2026 National Budget, inpasigurado ti presidente ti agtultuloy a suporta ti gobierno iti pagsayaatan dagiti soldado, karaman ti pannakaipangato ti base pay ken subsistence allowance dagiti military ken uniformed personnel.
Pinalagipan pay ti presidente dagiti baro a naipromote nga opisyal nga agserbi a custodian kadagiti public resources ita ta naipangato ti responsibilidad da kagiddan ti pannakaipangato ti ranggo da, aglalo iti panawen a kumarkaro ti pangta iti seguridad ken geopolitical tension.
Inpanakkel ni Presidente Marcos dagiti naaramid wenno nagapwanan ti Armed Forces of the Philippines iti napalabas a tawen, karaman ti modernisasyon, panangtulong iti panawen ti kalamidad, panagbantay iti kabaybayan, ken pannakipaset kadagiti joint military exercises iti sabali a pagilian.
Nagyaman pay ti presidente kadagiti pamilya dagiti soldado nga inawagan na nga agserserbi a naulimek ng adigi ti pigsa iti tunggal soldado.
