LAOAG CITY – Inrakurak ti Presidential Communications Office nga inaprubaran ni President Ferdinand Marcos Jr. ti rekomendasyon ni Transportation Secretary Jaime Bautista nga ipaayan dagiti unconsolidated jeepneys ti tallo a bolan tapno makikappeng wenno mangbuwangay ti kooperatiba wenno korporasyon.
Inlawlawag ti Presidential Communications Office a gagem ti nasao nga addang ket tapno maikkan ti gundaway dagiti nangiparipirip a kalikagom na ti agpa-consolidate ngem naamitan da ti cut-off.
Inpakaammo ti Presidential Communications Office a ti extension ket agingga intono Abril 30, 2024.
Immuna iti daytoy, inaprubaranen ti House Committee on Transportation ti maysa a resolusyon a mangkidkiddaw ken ni Presidente Ferdinand Marcos Jr. nga irekunsiderar ti January 31, 2024 deadline, mainaig iti consolidation iti babaen ti Public Utility Vehicle modernization program.
Maipalagip nga inrakurak ti Land Transportation and Franchising Regulatory Board nga adda ti pakabuklan a 1,767 a rota iti intero a pagilyan nga awan ti nagpa-consolidate a public utility jeepney (PUJ) drivers ken operators.
