LAOAG CITY – Bimmaban iti pwesto ni Manuel Bonoan kas sekretaryo ti Department of Public Works and Highways (DPWH) kabayatan ti imbestigasyon kadagiti maanomalya ken palpak a flood control projects iti pagilian.
Kinumpirmaran ni Presidential Communications Office Secretary Dave Gomez, nga inawat ni President Ferdinand R. Marcos Jr. ti resignation ni Bonoan nga agepekto intono bigat, Setyembre 1.
Dinutukan ni Presidente Marcos ni Department of Transportation Secretary Vince Dizon kas baro a sekretaryo ti Department of Public Works and Highways ken inbilin na ti naan-anay a panangdalos na iti departamento.
Maipalagip nga immunan nga inbatad ni Bonoan a saanna a baybay-an ti responsibilidad na nga agimbestigar iti maipagarop a korapsyon iti substandard wenno dagiti ghost flood control projects kalpasan nga adda dagiti indibidual ken sumagmamano nga agpanpanday linteg nga agpanpanawagan a bumaban iti pwesto.
Innayon na pay nga alisto laeng ti bumaba iti pwesto ngem saanna a tallikudan dagiti problema iti idadaulwan na a departamento.
