LAOAG CITY – Inbatad ni Presidente Ferdinand Marcos Jr., a saan a makibiang ti Pilipinas iti isyu ti Taiwan ken agtultuloy ti panangbigbig ti one-China policy.
Iti maysa nga interview, inrakurak ni Presidente Marcos nga ibilang ti Pilipinas nga internal matter ti isyu ti Taiwan.
Nupay kasta, inpetteng ti presidente a kalikagom ti Pilipinas a masolbar iti nainkapiyaan a wagas ti aniaman a tension wenno riribok iti lawlaw ti Taiwan.
Inpaganetget na pay nga adda ti agarop 200,000 a Pilipino ti agnanaed ken agtrabtrabaho idiay Taiwan isut gapuna a napateg iti gobyerno a mapagtalinaed ti kapia ken kinatalged iti rehiyon.
Innayon na nga agtultuloy met ti diplomatic engagement ti Pilipinas iti China karaman ti regular a panagtataripnong dagiti foreign ministers ti dua a pagilian tapno mapagtalinaed ti naurnus a komunikasyon.
Segun pay iti presidente, napateg a pagtitinnulungan dagiti pagilian iti Indo-Pacific region tapno maliklikan ti panaglalaban ken mapagtalinaed ti kapia iti rehiyon.
