LAOAG CITY – Aminado ni Presidente Ferdinand Marcos Jr. a saan nga usto ti disenyo ti narpuug a rangtay idiay Isabela.
Inrakurak daytoy ti presidente kalpasan ti panangbisita na ti narpuug a Cabagan-Santa Maria bridge kalpasan a nagsasaruno a nagna dagiti tallo nga overloaded a dump truck.
Inbatad ti presidente a patutukan na paylaeng iti gobierno ti pannakatarimaan ti rangtay sakbay a kamaten na dagiti adda iti likudan ti proyekto.
Ti nasao a rangtay a sakupen na ti 990 a metro ken bukbuklen ti 12 nga arko ken siyam nga span ti pre stressed concrete girders, ket nadisenyo para laeng kadagiti light vehicles ken maysa a napateg a rota a mamagkamang iti Cabagan ken Santa Maria iti Enrile, Cagayan ken Tabuk City, Kalinga.
Nangrugi a naipatakder ti rangtay ti Cabagan Santa Maria idi Nobyembre 2014 ken nalpas idi Pebrero 1, 2025 nga addaan ti pakabuklan a balor a P1.22 bilyon.
