LAOAG CITY – Inbilin ni Presidente Ferdinand “Bongbong” R. Marcos Jr. iti National Disaster Risk Reduction Management Council (NDRRMC) a tutukan ti panangdeterminar dagiti isolated areas tapno maiyalisto ti deployment ken ti panagibunong ti tulong iti baet ti napigsa a tudo ken layos a gubuay ti bagyo Carina.
Inaramid daytoy ni Marcos bayat ti pannakitaripnong na iti National Disaster Risk Reduction Management Council para iti briefer iti agdama a sitwasyon ti pagilian bayat ti iduduprak ti Bagyo Carina ken abagat.
Minandar pay ti presidente ti National Disaster Risk Reduction Management Council a makitinnulong iti Department of Social Welfare and Development ken iti Office of the Civil Defense.
Inpaganetget ni Marcos a saan laeng a rumbeng a mangipaay ti tulong ti National Disaster Risk Reduction Management Council kadagiti evacuees iti uneg ti evacuation centers no di ket uray kadagiti adda iti ruwar.
Immunan a nangitunda ti napigsa a tudo ken layos ti bagyo ken abagat isut gapuna a napaserraan ti sumagmamano a kalsada iti Metro Manila.
